متن نوحه ترکی زبانحال امام حسین در وداع با حضرت زینب از شاعر عاشورایی حقیر خویی
زبانحال حضرت امام حسین (علیه السلام) در وداع با حضرت زینب (سلام الله)
آیریلوق وقتیدی گل آغلاما بیچاره باجی
صبردن اوزگه خیال ایتمه ندور چاره باجی
باجی قارداش دم هجرانیده درد دل ائداخ
قلب تسکینینی درد دلیله حاصل ائداخ
آخر عمر وداعی سنیله کامل ائداخ
بیرده هیهات که قسمت اولا دیداره باجی
فوت اولور وقت شهادت او قدر یوخدی مجال
شام هجرانه مبدّل اولاجاق صبح وصال
گورماقون بیرده حسینون گورونور امر محال
گئدرم بزم سرا پرده ی دلداره باجی
خون دل خوان بلادن باجی قسمت دی منه
هر بلا گلسه قبول ایله سعادت دی سنه
صبری ترک ایلمه مندن بو وصیت دی سنه
مشتملدور بو وصیت نچه اسراره باجی
یتشور هرکیمه اول که نه قسمت یتشوب
قسمت آل پیمبرده شهادت یتشوب
دور ایدوب سلسله آخر منه نوبت یتشوب
دولانوب هاله یتوب نقطه پرگاره باجی
ایستیوب جانیمی بیر مرتبه جانانیم اگر
گچمیشم دوست یولوندا اولا مین جانیم اگر
گونده مین مرتبه حلقمدن آخا قانیم اگر
راضیم حق اوزی شاهد دی بو اقراره باجی
یتورور قتله بو صحراده منی قوم جهول
باغلانور سلسلیه سلسله تک آل رسول
صبره ماُمورسن ای نایب زهرای بتول
دستگیر اولسان اگر فرقه اشراره باجی
گوره سن ایسّی قوم اوسته دوشوب عریان بدنیم
پرتو شعشعه ی شمس اولوب پیرهنیم
خاک و خونیله اولا غسل و حنوط و کفنیم
خنجر و تیغیله جسمیم اولا صد پاره باجی
اوندا راضی دگلم چاک گریبان ایده سن
سس چکوب آغلیه سن ناله و افغان ایده سن
باش آچوخ زلف سرون یوزده پریشان ایده سن
خط ناخن ووراسان صفحه ی رخساره باجی
بانوان حرم محترم اطفال صغیر
باغلانور قول قولا بی جرم خطا خوار و اسیر
یتورور حدّ کماله ستمین شمر شریر
غل و زنجیر وورار عابد بیماره باجی
کوفه دن شامه کیمی آل علی ناقه سوار
دست بسته بوروموش چهره لرین گرد و غبار
قویولوب عشق بساطینده ازلدن بو قرار
اهل بیتین چکلر شامیده بازاره باجی
عشق سوداسیدی جانیله خریدار منم
عشق بازاری ایچون رونق بازار منم
بلی میدان شهادتده سزاوار منم
چکلر نوک جداده باشیمی داره باجی
سنه هر چند گراندور بو شهادت خبری
لیک وار نخل شهادتده شفاعت ثمری
گوز تیکوبدور منه یوخ اؤزگه ده اصلا نظری
قویمارام منده ((حقیری)) قالا اودلاره باجی
شاعر : حقیر خویی
متن نوحه ترکی زبانحال حضرت امام حسین (ع) در وداع با حضرت زینب (س) از حقیر خویی
بو ,حضرت ,اولا ,دی ,آل ,شهادت ,وداع با ,با حضرت ,در وداع ,حضرت زینب ,امام حسین
درباره این سایت